放風箏地點-推薦-邊度放風箏

塔門

塔門係一個迷人小島，可以喺度享受漁村風情，亦都可以在遼闊草原上野餐、放風箏，享受海天一色的明媚風光。

就腳：★★☆☆☆

要搭車又搭船，閒日入去嘅話船期都唔係咁密，要預早Check定時間。

風力：★★★★☆

放風箏無難度，對住個無敵大海景，當然有無敵大海風！

風景：★★★★★

呢度風景真係一流，要山有山要海有海要石有奇石，藍天白雲，放完風箏食返個海膽炒飯，正！

附近有無風箏賣？：無，上年賣風箏間士多今年唔做啦！

評語：早起的鳥兒有蟲吃，唔怕早起，唔暈船浪呢度係好選擇！

地點：

大坳門

大坳門係香港最熱門的郊野公園之一。設施補給完善，日頭郊遊下午放風箏夜晚睇星星無難度！

就腳：★★★★☆

搭91號巴士行大約20分鐘可以到達，公園外都有泊車位，揸車人士最啱啦！

風力：★★★★★

風箏新手都岩玩，一放就飛！仲可以放到超高都仲Feel到啲張力！

風景：★★★★★

背山面海咁放風箏，場地又夠闊夠大，成個天都係風箏好壯觀啊！

附近有無風箏賣？：有，清水灣公園入口有士多賣風箏，約$100一隻連線，士多叔叔會幫你Set埋架！

評語：一句講曬，大坳門放風箏快靚正！

地圖：

大尾篤水壩

就腳：★★★☆☆

喺大埔墟有巴士或者小巴入大尾督，班次都算密。

風力：★★★☆☆

風力都可以，但見到樹上面掛住一隻隻風箏殘骸，風向差少少啦！

風景：★★★☆☆

石屎地，其實旁邊係幾靚，水壩景，但放風箏戈度睇唔到。

附近有無風箏賣？：有，BBQ場小食亭有售。

評語：水壩起點比較多人放風箏，想少人要行過過水壩放，但地方就比較細。另外提提大家要注意水份補給啊！去到水壩另一邊無水賣架！

地圖：

大埔海濱公園

大埔海濱公園佔地約22公頃，係康樂及文化事務署轄下最大嘅公園。公園斥資二億一千萬元興建，提供多項體育設施，並設有昆蟲屋同多個主題花園，動靜皆宜。園內亦設香港回歸紀念塔，遊人登塔，吐露港迷人景致盡收眼底。

就腳：★★★★★

搭去富善邨行入去又得，踩單車入去又得！出返市區好方便！

風力：★★★☆☆

風力一陣一陣，去到下午風比較細。

風景：★★☆☆☆

公園大草地，人造園景，行上回歸塔係幾靚嘅。

附近有無風箏賣？：有

評語：最就腳，仲可以去吓影相，風力都夠，不過人就多啲，放風箏要注意安全啊！

地圖：

泥涌

泥涌鄰近馬鞍山新市鎮，係西貢西北。呢度係濕地地區，長滿紅樹林同一啲貝類生物，同時亦有郊野公園，早係1970年代已經有燒烤場，為燒烤勝地，亦適合放風箏。泥涌石灘的斷橋、小碼頭、黑岩石及紅木欄杆，亦係不錯嘅拍攝熱點。

就腳：★★★☆☆

要係刮溪沙或馬鞍山轉小巴／巴士先入到黎，但地點同車站好近，尚算方便。

風力：★★★★★

唔知係咪我好彩，一拎隻風箏出黎佢就自己飛咗上天，放風箏無難度！

風景：★★★★★

呢度人少，又有天空之鏡，仲唔污糟，香港難得嘅好地方！

附近有無風箏賣？：無

評語：就算唔放風箏，都好值得黎坐下、吹吹海風，好啱同男女朋友黎拍拖，好浪漫架！

地圖：

其實仲有幾多地方可以放風箏，例如龍蝦灣風箏場，不過小編同啲行山友傾計嘅時候得知龍蝦灣係要背住個海放風箏，而且風力時大時細，要放風箏有啲難道，所以就唔同大家推薦啦！